ಯುಗಾದಿ ಆಶಯ

ಮೆಟ್ಟಿ ದಾಟು ಅಹಂಕಾರದ ದಿಬ್ಬ -

ಆಚರಿಸು ಹೃದಯವಂತಿಕೆಯ ಹಬ್ಬ .

ಮುನಿಸಿರದೆ ಮನ ಹಸನಿರುವುದೇ ಹಬ್ಬ,

ಹಸಿದವಗೆ ಅಶನವೀವುದೇ ಹಬ್ಬ ,

ಹುಸಿಯಾಡದೆ ನೇರ ನಡೆವುದೇ ಹಬ್ಬ ,

ಬಿಸಜನಾಭನ ಸತತ ಸ್ಮರಣೆಯೇ ಹಬ್ಬ.

ವಸುಧೆಯೊಳು ಬಿದ್ದವರನೆತ್ತುವುದೇ ಹಬ್ಬ ,

ಮುಸಿ ಮುಸಿ ನಗುತ ನಗಿಸುತಿರುವುದೇ ಹಬ್ಬ ,

ವಿಷಯ ವಾಂಛೆಗಳಿಗೆ ಬಲಿಯಾಗದಿರುವುದೇ ಹಬ್ಬ ,

ಬಂದದುಣ್ಣುತ ಕೃಷ್ಣಾರ್ಪಣವೆನ್ನುವುದೇ ಹಬ್ಬ .

ಬದಲಾಗುತ್ತಲೇ ಇದೆ ಸಂವತ್ಸರ ,

ಎಷ್ಟಿದೆ ನಮ್ಮ ಮಾನಸಿಕ ಎತ್ತರ ?

ಬಾಳಿನ ನಡೆಯಾಗಿರಲಿ ನಿರ್ಮತ್ಸರ ,

ನಿಷ್ಕಪಟ ಬಾಳೇ ಭಗವಂತನಿಗೆ ಕರ .

ಹೊಸ ವರ್ಷದ ನಾಮ ದುರ್ಮುಖಿ ,

ದುರ್ಜನರಿಗೆ ಸದಾ ಅದು ದುರ್ಮುಖಿ ,

ಸಜ್ಜನರಿಗೆ ಎಂದೂ ತಾನು ಸುಮುಖಿ ,

ನಿರ್ಲಿಪ್ತ ಅಂತರ್ಮುಖಿ-ಸದಾ ಸುಖಿ .

ವೇದವ್ಯಾಸನ ನಿತ್ಯ ಸ್ತುತಿಪುದೇ ಹಬ್ಬ ,

ಸಾಧು ಸಜ್ಜನರೊಳು ನಲಿದಾಡುವುದೇ ಹಬ್ಬ,

ಸವಿ ನುಡಿಯುತ ಸಿಹಿ ಹಂಚುವುದೇ ಹಬ್ಬ,

ನೋಯದೇ ನೋಯಿಸದೇ ಬಾಳುವುದೇ ಹಬ್ಬ .

ಮುಖವಾಡಗಳ ಕಿತ್ತೆಸೆವುದೇ ಹಬ್ಬ ,

ನಖಶಿಖಾಂತ ಶುದ್ಧವಾಗಿರುವುದೇ ಹಬ್ಬ,

ಸುಜ್ಞಾನದ ನಿಜ ಹಂಬಲವೇ ಹಬ್ಬ ,

"ವಿಜ್ಞಾನಿ"ಯ ಇರವಿನ ಅರಿವೇ ಹಬ್ಬ .